Feb 17, 2013

ummeed

"Gumm hota hua bheed me socha ab kaun dekhega mujhe
Sir jhuka chupchap nikal jaunga
Bas abhi kuch hi door chal paya ki kisi ne tok diya
Wah mujhe hamesha pehchaan hi leti
usne shayad Apna naam ummeed batayA tha"

moksha

"Wahan samay ki lakiren bhi miti hui si hain..
sab kuch ruka hua sa...
na bhookh na pyaas..
Aisi khamoshi jise woh param anand kehte hain mujhe bechain kardeti hai...
shayad main iske kabil nahin..
shayad kabhi unhone ne jana nahi ki jeena kis chidiya ka naam hai"

sayane

"Aao fir se kisi choti si baat ka batangad banaya jaaye
ul julul batien karen
kuchh idhar ki kuchh udhar ki
.
.
bahut sayana ban liye
isme woh maza nahi"

Yadon ki potli

"
kal apne gaon se ek dost aaya tha
apne saath me khane ke saaman ki potli laya tha
meri mano to jaise potli me pakwan nahi
yaden thi
kuch yaden karari (aaj bhi )
kuch yaden khasta si aur utni hi lazeez
aur kuch yaden us parle G ke biscuit si
jo paiket me pade pade hi mehra gayi hai

fir chai manga li
aur ek ek kar sabhi yadon ka maja lene lage

haay, yadon se na dil bharta hai
aur na pet
"

Ek purana sheher

"aur un galiyon me
basa hua ek shehar .....
unchi imarton ..aur dikhawe ke aage dam todta sa lag raha tha
humne sar jhuka ke khairiyat poochi aur kaha
'huzoor muskuraiye aap lakhnau me hain'
yaden taza ho gayi
mano jaise un galiyon me fir se jaan aa gayi"